KAMA ndoto vile ndivyo tamko rasmi lilivyotangaza sasa. Lisome hapa kuhusu haki ya msingi kwa raia wa Tanzania sasa kumiliki Blogu lake. Wakati nikitembea nikawa wayani (katika mazungumzo ya simu) na Baragumu. Mazungumzo hayo yakazua neno na mjadala kuhusu ughaibuni. Ikawa kama tulikuwa tunaota kelele zetu za kuhamasisha blogu jipya kufunguliwa kule Stanford, California. Usiku wakati tukiwa katika mazungumzo ya kukaribisha blogu hilo jipya akaja huyu jamaa akahamasishwa kufungua Blogu kwa maelekezo ya simu akiwa KASRI na Baragumu na kisha Jarida la Ughaibuni akitumika kutuunganisha kwa simu yake. Baada ya dakika kama kumi na tano ikafunguliwa hii inayoitwa Kisima cha Weledi kutoka katika jimbo la Barrack Obama, mkenya yule Seneta wa Illinois. Baada ya hapo kama haitoshi kwa siku hiyo nikakutana na kijana wangu wa siku nyingi Gadiel kutoka nyumbani naye akinitaarifu kuwa harakati za kumuhamasisha sasa zimetimiza jukumu na blogu lake jipya hili hapa limefunguliwa. Kumbuka katika mwezi huu kuna blogu zaidi ya tano ambazo zimefunguliwa kwa mtindo wa papo kwa papo.

Nadhani jitihada hizi zafaa kuigwa na kupongezwa na hasa ndugu Jikomboe kwa ukarimu wa kukaribisha wanablogu wapya. Nitoe rai tu kwa wanablogu wapya, Kumbukeni kupita kwa wenzenu na kuwasalimia ili nao wapite katika majumba yenu. Na wanablogu wakongwe wasio na tabia ya kupita kwa wenzao wawe macho watakimbiwa maana mburogu sasa zimetangazwa kuwa haki ya kila raia Tanzania!