HIZI ni fikra zangu, zimekuwa na kushamiri zaidi tangu nimeishi ughaibuni. Niliweza fikiri chini ya mipaka zamani lakini sasa hapana! Kila ninapoulizwa wapi natoka jibu langu awali lilikuwa Tanzania. Kila nilipogundua kuwa hili si jibu sahihi huku ughaibuni nikabadilika, nikaanza kutangaza kutokea Afrika. Kila nitajapo jina hilo siulizwi wapi inapatikana! Maswali yanayofuata si mada yangu hapa leo.

Najivuna sana sasa kwa kuwa Mwafrika, nafarijika zaidi kwa kuwa natoka huko na maisha yangu yatakuwa huko na siku nikifa nipumzisheni huko. Kila ninapokutana na taarifa za machafuko kati ya Mwafrika na mwafrika naumia, naweweseka naugua moyoni. Kila nisikiapo mipango ya kuwatenga waafrika katika Afrika nauliza hawa wana maana gani? Je ni kukosa kutambua mipaka ya bara hili, ni kutofahamu tunavyounganishwa kila tuwapo nje ya bara hili? Kwa nini mipaka katika Afrika wakati mataifa makubwa yanafungua milango yao ili kutukandamiza na kutunyonya? Kwani Kenya kuwa na wasomi wengi ni kosa? Nigeria kuwa na idadi kubwa ya watu na wasomi pia ni dhambi? Je kuna haja ya kutimuana katika Afrika katika misingi ya kazi, elimu na masuala mengine? Hivi hizi suluba wanazozipata waafrika huku ughaibuni watasuuzika roho zao wapi kama si Afrika! Hivi nani ametuloga, nini maana ya Mungu ibariki Afrika? Mnasema tu hamtendi sio? Naandika maandishi haya kwa uchungu. Machozi yanaweza nitoka hapa lakini sitaki kisima hiki kitazamwe na hawa walionizunguka maana wote weupe. Hawa wanyonyaji wetu na wana sera zinazofanana! Si wote lakini wachache wao wenye nafasi za kiuchuimi na madaeraka hawatupendi kabisa. Wangetamani tuwe vipofu watunywese sumu! Hawatuthamini kabisa ...lakini sasa kwa nini na sisi twabaguana hivi? Hivi Watanzania mmekatazwa kwenda mataifa mengine? Kwanbi mlipokuwa mnanyimana Pasipoti ili mbakie nchini kwenu ndiyo tabu ya ninyi kuishi na wenzenu toka Afrika? Mtanisaidia mlio ughaibuni...siamini katika mipaka aliyoipanga Bismarck kichaa wa Ujerumani aliyekutana na wakora wenzake pale Berlin mwaka 1884-1885.

Hao vichaa wakatenga mipaka katika bara lisilo lao. Sasa tunashupalia mipaka hii na kuumizana wenyewe kwa wenyewe. Kweli tunaweza kuungana na kuwa na Afrika Mashariki kama hali ni hii ya kupandikiza chuki. Misingi ya maandishi yangu ni habari hii kutoka katika gazeti la Chama tawala Tanzania CCM AMBALO LIMEANDIKA HABARI HII.